Wanneer is ‘n vrou mooi? Kan elkeen van ons stylvol leef? Entrepreneur Suzanne Kotze gesels oor die geboorte van Stylvol.co.za ná die sluiting van die vrouetydskrif waar sy as skoonheidsredakteur gewerk het, die geheim van ‘n goeie vennootskap, en hoe sy die glanswêreld met ma-wees en ‘n bedrywige skedule versoen.

Is alle mense bo 65 één ouderdom: oud? Behels ouer word die een verlies op die ander, of is dit ‘n terrein wat ons vars kan verken? Dr. Johan Myburg praat oor vooropgestelde idees, hoe om jou beeld van jouself en jou werklikheid oop-oog te benader, sinvolle gesprekke en “aanhou beweeg en geraas maak.” Inhoud geborg.

Is rolprentresensent en skrywer Leon van Nierop ‘n sensitiewe kyker - of nie? Hy praat oor sy rol as resensent of “tussenganger”, die vloektaal, geweld en eksplisiete tonele wat kykers moet verwerk, oor genres, preutsheid en vraatkyk. Hy verduidelik hoe rolprente van TV-reekse verskil, hoe hy kies waarna hy kyk en gee sy definisie van ‘n goeie film.

Kan dit wees dat élkeen van ons kreatief is en ons skeppendheid deur speelsheid kan herontdek? RSG-programbestuurder en kreatiwiteitsafrigter Kobus Burger verduidelik hoe om struikelblokke in ons pad te systap, vergete drome te herwin, en op moontlikheidsdenke te fokus. Hy gee praktiese wenke om kreatiwiteit maklik en vinnig in ons lewens in te sluit.

Tydens grendeltyd het die digter Carina van der Walt, ver van haar land en mense, die “skoonheid van verval” ontdek. Dié manier van kyk, vergestalt in die Japannese lewenshouding Wabi Sabi, het haar aangespoor om foto’s te neem van die eenvoudige gawes van haar tuin en kombuis en om dit vars te interpreteer. Carina deel haar insigte én vertel van ’n tweede liefde, tuine, blomsimboliek, en die betekenis van kruie en vrugte wat in ’n bak op ’n kombuistafel verdroog. Inhoud geborg.

Ons fokus dikwels eerder op ons uitkomsgerigte linkerbreinkant, wat alles wat ons doen evalueer pleks van op ons intuïtiewe regterbreinkant, wat nie omgee of iets reg of verkeerd is nie. Voorligtingsielkundige Eleen Polson verduidelik hoe jy jou skeppende self deur klank, beweging of proseskuns kan stimuleer.