Al ooit daaraan gedink om iemand ná aan jou hart te verras met ‘n onverwagse geskenk? Luister gerus na die voorbeeld hieronder.

 Mariette en Mart-Marie gesels openhartig oor die soet en die seer van ma-en-dogterverhoudings: kommunikasiekwessies, rebelsheid, kwesbaarheid, goed genoeg wees, aanvaarding en ‘magic’. Hierdie episode word opgedra aan elke ma en dogter. (Sensitiewe inhoud: verwysing na geweld.)

Al meer mans en vroue besluit om nie kinders te hê nie. Wat vuur hierdie besluit aan, hoe behoort dit geneem te word, en watter gevolge kan dit hê?

Jou hart breek aan stukke wanneer jou kind emigreer, maar jy is ook bly oor die voordele en nuwe moontlikhede. Emigrasieterapeut dr. Sulette Ferreira belig aspekte van die besluit om te emigreer, vrae wat ouers kan vra, die ervaring van broers en susters, en grootouerskap oor grense heen. Sy gee praktiese wenke wat die “konstante afskeid” kan vergemaklik en beklemtoon wedersydse gesprek en betrokkenheid.

Is alle mense bo 65 één ouderdom: oud? Behels ouer word die een verlies op die ander, of is dit ‘n terrein wat ons vars kan verken? Dr. Johan Myburg praat oor vooropgestelde idees, hoe om jou beeld van jouself en jou werklikheid oop-oog te benader, sinvolle gesprekke en “aanhou beweeg en geraas maak.” Inhoud geborg.

Is rolprentresensent en skrywer Leon van Nierop ‘n sensitiewe kyker - of nie? Hy praat oor sy rol as resensent of “tussenganger”, die vloektaal, geweld en eksplisiete tonele wat kykers moet verwerk, oor genres, preutsheid en vraatkyk. Hy verduidelik hoe rolprente van TV-reekse verskil, hoe hy kies waarna hy kyk en gee sy definisie van ‘n goeie film.

Hoewel versuim om onderhoud te betaal ‘n kriminele oortreding is, ontvang talle primêre versorgers nie die onderhoud wat hulle of hul kinders toekom nie. ‘n Nuwe inisiatief verhoed dat onderhoudwanbetalers voortgaan om krediet te ontvang terwyl hulle onderhoud verskuldig is – en ‘n nuwe toep help geskeide ouers om misverstande en konflik te beperk. (Hierdie artikel het in die Februarie 2023-uitgawe van ‘rooi rose’ verskyn.)

Meer as 60% van die kinders in Suid-Afrika word sonder ‘n pa groot. Dan is daar seuns met pa’s wat fisiek teenwoordig is, maar op ander vlakke afwesig. In sy boek Seuns sonder pa’s ondersoek joernalis Julian Jansen die oorsake en gevolge van hierdie diep verwonding en vertel hy die verhaal van sy eie pa: die held, maar ook die skurk van hulle gesin. Julian gesels met Mariette Snyman oor sy boek, nuwe navorsing oor vaderloosheid, en praktiese en geestelike oplossings.

Pastorale narratiewe terapeut dr. Marietjie van Loggerenberg praat oor die hantering van ‘n kind wat uit die kas kom, skok en skaamte, wanpersepsies rakende gay-wees, en die vrees vir verwerping en seksueel oordraagbare siektes. Sy gee raad - ook vir ouers wat ‘n geloofstryd beleef - en omlyn 7 stappe na die uiteindelike aanvaarding van ‘n kind se seksuele oriëntasie. Sensitiewe inhoud: dié gesprek is vir volwassenes bedoel.

Sou jy graag wou weet wat jou huisdier dink of wil hê? Jenny Shone, ‘n ervare dieretelepatie-kommunikeerder, verduidelik dis nes ‘n nuwe taal wat jy aanleer. Sy praat oor die drie maniere waarop diere kommunikeer, die opsporing van vermiste diere, en hoe troeteldiere se gedrags- of gesondheidsprobleme gesinskwessies kan weerspieël.

Die besluit om te skei, die egskeidingsproses en die aanpassing daarná is emosioneel uitmergelend en behels groot praktiese uitdagings. As jy iemand in hierdie situasie wil bystaan, moet jy dit oordeelkundig doen. Pastorale terapeut ds. Braam Klopper verduidelik hoe jy van hulp kan wees, wat om nié te doen nie en hoe om vertroulike inligting te hanteer. Hy gee ook raad oor die geloofsworsteling wat egskeiding vir gelowiges kan meebring.

Do you need a manual for your teen? A book written by a psychiatrist for teens and their parents clarifies the changes in teenagers’ brains and bodies; the challenges they face; and the support they require to form a healthy identity. Dr. Terri Henderson explains how knowledge and informed choices can lessen anxiety, strengthen relationships, and ensure a better outcome for all.

Elke mens treur anders. Ds. Braam Klopper, pastorale terapeut en rouspesialis, verduidelik hoe die manier waarop iemand sterf en ander faktore ons hantering van smart beïnvloed. Ons moet ook verstaan dat mans en vroue droefheid verskillend verwerk. Begrip vir uiteenlopende roupatrone, sienings van lojaliteit en benaderings tot intimiteit maak dit makliker om mekaar te ondersteun.

Wanneer jy hoor jou dogter is lesbies of jou seun is gay, het jy sinvolle inligting en advies nodig. Dr. Marietjie van Loggerenberg, pastorale narratiewe terapeut, bespreek navorsing oor die oorsake van homoseksualiteit, wanopvattings en die vrees vir verwerping, opbouende kommunikasie, en die geloofstryd wat gelowige ouers (en hul gay kind) mag beleef.
Sensitiewe inhoud: bespreking van onder meer seksuele oriëntasie. Dié gesprek is vir volwassenes bedoel.

Het jy of iemand ná aan jou ‘n psigiese siekte? Joernalis Pieter van Zyl praat oor sy boek, “Verhale van hoop: só help jy jou geliefde en jouself”, vir mense wat met ‘n uitdaging soos depressie, angsversteuring, opgaarsindroom of obsessief-kompulsiewe versteuring saamleef. Hy vertel waar die aangrypende verhale in sy boek vandaan kom; van sy eie pad met angsversteuring, major depressie en ‘n lewensmaat met bipolariteit; en hoe die navorsing en praktiese raad in sy boek uit sy eie dringende behoefte aan hulp gebore is.

Maatskaplike werker Annette de la Porte het nie net werkservaring van depressie nie, maar het 34 jaar met depressie in die huis saamgeleef. As jy oor iemand besorg is en self swaarkry, is Annette se verduideliking van wat in die brein gebeur, die simptome en die behandeling van depressie inssiggewend. Sy gee praktiese raad oor die emosionele en ander gevolge vir die persoon met depressie sowel as vir die huismense, en hoe om dit te hanteer.

Een ding staan vas: niks bly soos dit is nie – veral wanneer ‘n pandemie die wêreld tref. Baie van ons moes emosionele, finansiële, gesondheidsverwante of ander terugslae die hoof bied en probeer steeds ons balans herwin. Wat bepaal of ons weer opstaan, of bly lê? Ilse Salzwedel gesels oor Floreer, ‘n praktiese gids met aangrypende verhale en duidelike riglyne oor hoe om ‘n betroubare hulpbron te ontwikkel: veerkragtigheid.

In baie lande word ‘n natuurlike geboorte toenemend as die beste opsie vir ‘n gesonde ma met ‘n normale swangerskap beskou. Is dit veilig – en is dit gewens? Geboorte-opvoedkundige Cozette Laubser belig die voorwaardes vir en voordele van ‘n bevalling sonder mediese ingrepe, onder die oog van ‘n opgeleide vroedvrou. Sy bespreek die ideale geboorteomgewing, die geboortespan, die rol van hormone in die kraamproses, die “fetus ejection reflex” en natuurlike en farmaseutiese maniere om pyn te beheer.

Ons kan kinders nie weghou van die dood nie: hulle kom dit in rekenaarspeletjies en die media teë. Volwassenes is dalk ongemaklik met die onderwerp, maar sodra ‘n kind direk geraak word, het ons die regte woorde nodig. Alta Bence van die CHOC Childhood Cancer-stigting gee riglyne oor hoe om die dood te verduidelik, ons eie hartseer te deel, wanneer ‘n kind ‘n oorledene se liggaam moet sien, en hoe om ‘n kind met ‘n terminale siekte te begelei.  

Haal die angel uit huiswerk met hierdie praktiese wenke wat jou kind se breinfunksie, ontwikkelingsvlak en behoefte aan positiewe versterking in ag neem. ‘n Kundige gee raad oor wanneer en hoe om pouses in te bou en wat om te doen as huiswerk te veel raak . Loer veral na die pret wat julle met spelling kan hê!